امریکی ماہرین نے خبردار کیا ہے کہ ایک طاقتور شمسی طوفان زمین کی جانب تیزی سے بڑھ رہا ہے۔ امریکی نیشنل اوشیئنک اینڈ ایٹماسفیئرک ایڈمنسٹریشن (NOAA) کے مطابق، یہ شمسی طوفان توانائی کے گرڈز اور ریڈیو مواصلاتی نظام میں خلل ڈال سکتا ہے۔
یہ انتباہ حالیہ دنوں میں سورج سے خارج ہونے والی طاقتور شمسی توانائی کا مشاہدہ کرنے کے بعد دیا گیا ہے، جس کے نتیجے میں جیو میگنیٹک طوفان کا خطرہ پیدا ہوا ہے۔ ماہرین کا کہنا ہے کہ ایسے طوفان نہ صرف مواصلاتی نظام کو متاثر کرتے ہیں بلکہ بجلی کی فراہمی اور اسپیس کرافٹس کو بھی نقصان پہنچا سکتے ہیں۔
NOAA نے توانائی کے گرڈز اور اسپیس کرافٹس کے آپریٹرز کو حفاظتی تدابیر اپنانے کی سختی سے ہدایت کی ہے۔ اس کے ساتھ ساتھ، فیڈرل ایمرجنسی مینجمنٹ ایجنسی (FEMA) کو بھی ممکنہ توانائی کے تعطل سے آگاہ کر دیا گیا ہے تاکہ حفاظتی اقدامات پہلے سے کیے جاسکیں۔
ماہرین کے مطابق یہ طوفان گزشتہ مئی میں آنے والے طوفان سے کم شدید ہوسکتا ہے، لیکن ابھی تک اس کی صحیح طاقت کا اندازہ نہیں لگایا جاسکا۔ یہ طوفان 10 لاکھ میل کے فاصلے پر پہنچنے کے بعد مزید درست پیمائش ممکن ہوگی۔
کیوں ہوتا ہے شمسی طوفان نقصان دہ؟
شمسی طوفان تب ہوتا ہے جب سورج سے خارج ہونے والی توانائی اور پارٹیکلز زمین کے مقناطیسی میدان سے ٹکراتے ہیں، جس کے نتیجے میں برقیاتی سسٹم، سیٹلائٹ نیٹ ورک، اور ریڈیو سگنلز متاثر ہوسکتے ہیں۔ اس طرح کے طوفان نہ صرف تکنیکی نظام میں خلل ڈال سکتے ہیں بلکہ طویل مدتی برقیاتی نظام کی بندش کا بھی سبب بن سکتے ہیں۔
احتیاطی تدابیر
ماہرین کی جانب سے اداروں اور کمپنیوں کو احتیاطی تدابیر اختیار کرنے کی ہدایت دی جا چکی ہے تاکہ اس شمسی طوفان کے اثرات سے بچا جاسکے۔
