کیا آپ جانتے ہیں کہ روزانہ ایک سیب کھانے سے نہ صرف آپ کی مجموعی صحت بہتر ہو سکتی ہے بلکہ آپ کو دماغی بیماریوں جیسے ڈیمینشیا سے بھی بچایا جا سکتا ہے؟
یہ کہاوت کہ "روزانہ ایک سیب کھانے سے آپ ڈاکٹر کو دور رکھ سکتے ہیں” دماغی صحت کے حوالے سے بالکل درست ثابت ہوتی ہے۔ شمالی آئرلینڈ میں کی گئی ایک تحقیق میں معلوم ہوا ہے کہ سیب اور دیگر فلیونوئڈز سے بھرپور غذائیں جیسے چائے اور بیریز، دماغی تنزلی کو روکنے میں مددگار ثابت ہوتی ہیں۔
دماغی تنزلی سے تحفظ
فلیونوئڈز وہ قدرتی مرکبات ہیں جو سیب، بیریز، انگور، اور چائے جیسی غذاؤں میں پائے جاتے ہیں۔ یہ مرکبات دماغی افعال کو بہتر بنانے، خون کی شریانوں کی کارکردگی کو بڑھانے، اور ورم کو کم کرنے میں اہم کردار ادا کرتے ہیں۔
مطالعے کے دوران 48 سے 70 سال کے افراد کی غذائی عادات اور دماغی صحت کا جائزہ لیا گیا۔ نتائج کے مطابق فلیونوئڈز سے بھرپور غذاؤں کا مستقل استعمال کرنے والے افراد میں ڈیمینشیا کے خطرے میں 28 فیصد تک کمی دیکھی گئی، جب کہ وہ افراد جن میں جینیاتی طور پر اس بیماری کا زیادہ خطرہ تھا، ان کے لیے یہ فائدہ 43 فیصد تک بڑھ گیا۔
سیب اور چائے کے فوائد
محققین کا کہنا ہے کہ چائے اور بیریز میں فلیونولز کی زیادہ مقدار پائی جاتی ہے، جو دماغی صحت کے لیے نہایت فائدہ مند ثابت ہو سکتی ہے۔ روزانہ ایک سیب کھانے اور چائے پینے کی عادت کو اپنانا دماغ کو تندرست اور تنزلی سے محفوظ رکھنے کا ایک مؤثر ذریعہ ہے
