گوگل نے اپنے سرچ انجن میں نئے اور طاقتور اے آئی فیچرز کا اضافہ کیا ہے، جسے کمپنی نے اپنی تاریخ کی اہم ترین اپ ڈیٹس میں شمار کیا ہے۔ یہ فیچرز صارفین کے تجربے کو مزید بہتر اور انٹرایکٹو بنانے کے لیے متعارف کرائے گئے ہیں۔
نئی اپ ڈیٹس کے تحت برطانیہ میں اینڈرائیڈ اور آئی او ایس گوگل ایپ صارفین کو یہ سہولت حاصل ہوگی کہ وہ اپنے فون کا کیمرہ کسی چیز پر مرکوز کرنے کے بعد صرف آواز کی مدد سے سوالات پوچھ سکیں۔ اس کا مقصد سرچ کے عمل کو مزید سہل بنانا ہے تاکہ صارفین جلد اور بہتر نتائج حاصل کرسکیں۔
مزید یہ کہ گوگل اپنے "سرچ لیبز” پروگرام کے تحت ایک نیا اے آئی فیچر بھی متعارف کرانے والا ہے، جس کے ذریعے صارفین ویڈیو ریکارڈنگ کے دوران بھی سوالات پوچھ سکیں گے۔ یہ ٹیکنالوجی ویڈیو اور صارف کے سوال کو بیک وقت پروسیس کرے گی، جو ویڈیوز دیکھنے اور سمجھنے کے عمل کو مزید آسان بنائے گی۔
یہ اپ ڈیٹس ٹیکنالوجی کمپنیوں کے درمیان بڑھتی ہوئی مسابقت کا حصہ ہیں، جس کا مقصد ہے کہ صارفین کو جنریٹو اے آئی ٹولز کے ذریعے بہتر سہولیات فراہم کی جائیں اور مزید صارفین کو پلیٹ فارم کی جانب راغب کیا جا سکے۔
