صحارا کا خشک ترین صحرا بارش کے بعد حیرت انگیز اور دلکش منظر میں بدل گیا ہے، جس نے لوگوں کو سحر میں مبتلا کر دیا۔ مراکش کے جنوب میں واقع یہ وسیع صحرائی علاقہ، جو عام طور پر سال بھر میں نہ ہونے کے برابر بارش دیکھتا ہے، غیر معمولی طور پر دو دنوں کی شدید بارشوں کے بعد سیلابی پانی سے بھر گیا ہے۔
رپورٹس کے مطابق، مراکش کے دارالحکومت رباط سے تقریباً 450 کلومیٹر دور گاؤں ٹیگونائٹ میں ستمبر کے دوران 100 ملی میٹر سے زیادہ بارش ہوئی، جو اس علاقے کے لیے غیر معمولی ہے۔ اس شدید بارش کے نتیجے میں صحرائے صحارا کے کئی حصے پانی سے بھر گئے، اور یہ ریتیلے علاقے ایک خوبصورت اور منفرد منظر پیش کرنے لگے۔
اس قدرتی واقعے کے دوران ایک اور حیران کن تبدیلی بھی دیکھی گئی، جب 50 سال سے خشک پڑی ایریکی جھیل بھی پانی سے بھر گئی۔ یہ جھیل نصف صدی بعد سیلابی پانی کے باعث دوبارہ زندگی میں آگئی۔
مراکش کے موسمیاتی ادارے کے ماہرین نے بتایا کہ 30 سے 50 سال کے طویل عرصے کے بعد اتنی شدید بارش دیکھنے کو ملی ہے۔ اگرچہ یہ بارشیں کچھ علاقوں میں زرعی زمینوں کے لیے مفید ثابت ہوئیں، مگر مراکش اور الجزائر کے کئی حصوں میں اس سیلابی صورت حال سے جانیں ضائع ہوئیں اور فصلوں کو نقصان پہنچا۔
یہ منفرد منظر نامہ نہ صرف ایک قدرتی خوبصورتی کا شاہکار ہے، بلکہ موسمیاتی تبدیلی کے اثرات اور اس کے غیر متوقع نتائج کی بھی ایک مثال ہے۔
